ಮಿಶನರಿ ಭುಗ್ರ್ಯಾಂಚ್ಯಾ ಮೆಳಾಚಾ ದಿಸಾಚೆಂ ಆಚರಣ್

ಫೆಬ್ರೆರ್ 14 ತಾರಿಕೆರ್ ಜಾಗತಿಕ್ ಮಟ್ಟಾರ್ ಮಿಶನರಿ ಭುಗ್ರ್ಯಾಂಚ್ಯಾ ಮೆಳಾಚೊ ದೀಸ್ ಆಚರಣ್ ಕರ್ತಾತ್. ಆಮ್ಚ್ಯಾಯ್ ಫಿರ್ಗಜೆಂತ್ ಭೋವ್ ಅರ್ಥಾಭರಿತ್ ರಿತಿನ್ ಹೊ ದೀಸ್ ಆಚರಣ್ ಕೆಲೊ. ಮಾ. ಬಾ. ಹೆರಾಲ್ಡ್ ಪಿರೇರಾ, 20 ಆಯೋಗಾಂಚೆಂ ದಿಯೆಸಿಜಿ ಹಂತಾಚೆ ಸಂಯೋಜಕ್ ತಶೆಂಚ್ ಲ್ಹಾನ್ ಕ್ರಿಸ್ತಾಂವ್ ಸಮುದಾಯಾಚೆಂ ನಿರ್ದೇಶಕ್ ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್‍ಲ್ಲೆ. ಸಕಾಳಿಂ 9 ಥಾವ್ನ್ 10 ವೊರಾಂ ಪರ್ಯಾಂತ್ ಭುಗ್ರ್ಯಾಂಕ್ ಹ್ಯಾ ಮೆಳಾ ವಿಶಾಂತ್ ಆನಿ ತಾಂಚ್ಯಾ ವಾವ್ರಾ ವಿಶಿಂ ತಾಣಿಂ ಮಾಹೆತ್ ದಿಲಿ.

ಮಿಶನರಿ ಭುಗ್ರ್ಯಾಂಚೊ ಮೇಳ್ ‘ದುಬ್ಳ್ಯಾ ಆನಿ ನಿರ್ಗತಿಕ್ ಭುಗ್ರ್ಯಾಂ’ ಥಂಯ್, ಭುಗ್ರ್ಯಾಂನಿಂ ಭುಗ್ರ್ಯಾಂಕ್ ಕುಮಕ್ ಕರ್ಚಿ ಮ್ಹಳ್ಳ್ಯಾ ಧ್ಯೇಯಾಖಾಲ್ ವಾವುರ್ತಾ. ಜೆಂ ಕಿತೆಂ ಇಲ್ಲಿ ಉರವ್ಣಿ ಭುರ್ಗಿಂ ಕರ್ತಾತ್ ತಾಚೆ ಸವೆಂ ಮಾಗ್ಣ್ಯಾ ವೆಳಿಂ ಹ್ಯಾ ಗತ್ ಆಧಾರ್ ನಾತ್‍ಲ್ಲ್ಯಾ ಭುಗ್ರ್ಯಾಂಚೊ ಉಡಾಸ್ ಕಾಡ್ನ್ ಮಾಗ್ತಾತ್. ಅಶೆಂ ತಾಂಚೆ ಥಾವ್ನ್ ಜಾಂವ್ಚಿ ಕುಮಕ್ ಹ್ಯಾ ಮೆಳಾದ್ವಾರಿಂ ತಿ ದಿತಾತ್.

ಪ್ರಸ್ತುತ್ ಹ್ಯಾ ಮೆಳಾಂತ್ 5 ವ್ಯಾ ಕ್ಲಾಸಿ ಥಾವ್ನ್ 10 ವ್ಯಾ ಕ್ಲಾಸಿ ಮ್ಹಣಾಸರ್ 65 ಜಣಾಂ ಭುರ್ಗಿಂ ಆಸಾತ್. ಹರೆಕಾ ಮಹಿನ್ಯಾಚ್ಯಾ ಪಯ್ಲ್ಯಾ ಆಯ್ತಾರಾ 9 ವೊರಾಂ ತಾವ್ನ್ 10 ಮ್ಹಣಾಸರ್ ಜಮಾತಿಕ್ ತಿಂ ಹಾಜರ್ ಜಾತಾತ್ ಆನಿ ಸಚೇತಕಾಂ ಥಾವ್ನ್ ಸಮ್ಜೊಣಿ ಜೊಡ್ತಾತ್. ಬಾ. ಹೆರಾಲ್ಡ್ ಪಿರೆರಾನ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಮಿಸಾ ಉಪ್ರಾಂತ್ ಸರ್ವ್ ಭುಗ್ರ್ಯಾಂಕ್ ಫಳಾಹಾರ್ ಆಸಾ ಕೆಲ್ಲೊ. ಪರ್ಗಟ್ಣಿ ಆನಿ ಸುವಾರ್ತಾ ಪ್ರಸಾರ್ ಆಯೋಗಾಚಿ ಸಂಚಾಲಕಿ ಆನಿ ಹ್ಯಾ ಮೆಳಾಚಿ ಸಚೇತಕಿ ಶ್ರೀಮತಿ ಡೊರಾ ಆರೊಜಾ, ಕ್ರಿಸ್ತಾಂವ್ ಶಿಕ್ಷಣಾಚಿ ಸಂಯೋಜಕಿ ಶ್ರೀಮತಿ ರೂಪ ಮಚಾದೊ, ಫಿರ್ಗಜ್ ವಿಗಾರ್ ಭೋ. ಮಾ. ಬಾ. ಸ್ಟ್ಯಾನಿ ಬಿ. ಲೋಬೊ ಆನಿ ಸಹಾಯಕ್ ವಿಗಾರ್ ಹಾಜರ್ ಆಸ್‍ಲ್ಲೆ. ಶ್ರೀಮತಿ ಡೊರಾ ಆರೋಜಾನ್ ಸಗ್ಳ್ಯಾ ಕಾರ್ಯಕ್ರಮಾಚಿ ಮಾಂಡಾವಳ್ ಘಾಲ್ಲಿ ಆನಿ ತೆಂ ಚಲೊವ್ನ್ ವೆಲೆಂ.