ಫಿರ್ಗಜ್ಗರಾಂಕ್ ವಾಡ್ಯಾವಾರ್ ಖೆಳಾ ಪಂದ್ಯಾಟ್ ಗದ್ದಳಾಯೆನ್ ಚಲಯ್ಲೆ
![](https://sfxchurchudyavar.in/wp-content/uploads/2021/02/WhatsApp-Image-2021-02-22-at-2.17.23-PM.jpeg)
ಐ.ಸಿ.ವೈ.ಎಮ್ ಭಾಂಗರೋತ್ಸವ್ ಸಮಿತಿ ತರ್ಫೆನ್, ತಾಂಚೆ ಭಾಂಗಾರೋತ್ಸವಾಚೆಂ 46 ವೆಂ ಕಾರ್ಯಕ್ರಮ್ ಜಾವ್ನ್ ಫಿರ್ಗಜ್ಗರಾಂಕ್ ವಾಡ್ಯಾವಾರ್ ಖೆಳಾ ಪಂದ್ಯಾಟ್ ಫೆಬ್ರವರಿಚ್ಯಾ 21 ತಾರಿಕೆರ್ ಸಾಂ. ಫ್ರಾನ್ಸಿಸ್ ಸಾವೆರ್ ಆಂಗ್ಲ್ ಮಾಧ್ಯಮ್ ಇಸ್ಕೊಲಾಚ್ಯಾ ಮೈದಾನಾರ್ ಚಲ್ಲೆ. ದಾದ್ಲ್ಯಾಂಕ್ ವಾಲಿಬಾಲ್ ಆನಿ ದೊರಿ ವೊಡ್ಚೊ ತಶೆಂಚ್ ಸ್ತ್ರೀಯಾಂಕ್ ತ್ರೋಬಾಲ್ ಆನಿ ದೊರಿ ವೊಡ್ಚೊ ಸ್ಪರ್ದೊ ಆಯೋಜನ್ ಕೆಲ್ಲೊ. ಫಿರ್ಗಜಿಚ್ಯಾ 19 ವಾಡೆ 15 ಟಿಮಾಂ ಘಡುನ್ (ಸಂಖೊ ಉಣೊ ಆಸಲ್ಲೆ ವಾಡೆ ಘಡ್ಸುನ್) ಎಕಾಮೆಕಾ ಮಧೆಂ ಖೆಳಾಂತ್ ಕೋಣ್ ಹುಶಾರ್ ಮ್ಹಣುನ್ ತಾಂಚಿಂ ತಾಲೆಂತಾ ಪ್ರದರ್ಶಿತ್ ಕೆಲಿಂ.
ಫೆಬ್ರೆರ್ 21 ವೆರ್ ದೊನ್ಪಾರಾಂ ಜುಸ್ತ್ 1.30 ವೊರಾರ್ ಶಿಸ್ತೆನ್ ಹಾಜರ್ ಜಾಲ್ಲ್ಯಾ ಸರ್ವ್ ವಾಡ್ಯಾಂಚ್ಯಾ ಖೆಳ್ಗಾಡ್ಯಾಂನಿ ಖೆಳಾಂತ್ ವರ್ತಿ ಹುಮೆದ್ ದಾಕಯ್ಲಿ. ಸುರ್ವೆರ್ ಫಿರ್ಗಜ್ ಸಹಾಯಕ್ ವಿಗರಾ ಬಾ. ರೋಲ್ವಿನ್ ಅರಾನ್ಹಾನ್ ಖೆಳಾಂಚೆರ್, ಸ್ಪರ್ದಿಕಾಂಚೆರ್ ಆನಿ ತೀರ್ಪ್ದಾರಾಂಚೆರ್ ದೆವಾಚೊ ಆಶಿರ್ವಾದ್ ಮಾಗ್ಲೊ. ಪಯ್ಲೊ ಪಂದ್ಯಾಟ್ ಫಾತಿಮಾ ಎ ಆನಿ ಕಾರ್ಮೆಲ್ ಎ (ವಾಲಿಬಾಲ್) ತಶೆಂಚ್ ಸಾವುದ್ ಎ ಆನಿ ಮೊಂತಿ (ತ್ರೋಬಾಲ್) ಚಲ್ಲೊ. ತಾಚ್ಯಾ ಉಪ್ರಾಂತ್ ಮಟ್ವೆಂ ಉದ್ಗಾಟನಾಚೆಂ ವೆದಿ ಕಾರ್ಯೆ ಚಲವ್ನ್ ವೆಲೆಂ. ಆಯ್ಲೆವಾರ್ ಆಮ್ಚ್ಯಾ ಫಿರ್ಗಜ್ ವ್ಯಾಪ್ತಿಂತ್ಲ್ಯಾ ತೀನ್ ಗ್ರಾಮ ಪಂಚಾಯತಾಂತ್ ಜಿಕೊನ್ ಯೇವ್ನ್ ಅಧ್ಯಕ್ಷ್ ಆನಿ ಉಪಾಧ್ಯಕ್ಷ್ ಜಾಲ್ಲ್ಯಾಂಕ್ ಅಭಿನಂದನ್ ಆನಿ ಗೌರವ್ ಪಾಟಂವ್ಚೆಂ ಕಾರ್ಯಕ್ರಮ್ ಚಲವ್ನ್ ವೆಲೆಂ. ಉದ್ಯಾವರ್ ಗ್ರಾಮ ಪಂಚಾಯತ್ ನವ್ಯಾನ್ ಚುನಾಯಿತ್ ಜಾಲ್ಲೊ ಅಧ್ಯಕ್ಷ್ ಶ್ರೀ ರಾಧಕೃಷ್ಣ ಶ್ರೀಯಾನ್ ಉಲೊವ್ನ್, ಗೌರವ್ ಪಾಟಯ್ಲ್ಯಾಕ್ ಧಿನ್ವಾಸ್ಲೆ ಆನಿ ತಾಚ್ಯಾ ಆವ್ದೆಂತ್ ಆಮ್ಕಾಂ ಆನಿ ಆಮ್ಚ್ಯಾ ಸರ್ವ್ ಕಾರ್ಯಕ್ರಮಾಂಕ್ ಆನಿ ಅಭಿವೃದ್ಧೆಚ್ಯಾ ಕಾಮಾಂಕ್ ಸಂಪೂರ್ಣ್ ಪ್ರೋತ್ಸಾಹ್ ಭಾಸಾಯ್ಲೊ. ಹ್ಯಾ ಖೆಳಾ ಪಂದ್ಯಾಟಾಚಿ ಪ್ರಾಯೋಜಕಿ ಶ್ರೀಮತಿ ಪ್ರೆಸಿಲ್ಲಾ ಪಿರೆರಾ ಉಲವ್ನ್ ಸಕ್ಡಾಂಕ್ ಬರೆಂ ಮಾಗಿಲಾಗ್ಲಿ. ಅಧ್ಯಕ್ಷ್ ಸ್ಥಾನರ್ ವಿಗಾರ್ ಭೋ. ಮಾ. ಬಾ. ಸ್ಟ್ಯಾನಿ ಬಿ. ಲೋಬೊ ಉಲವ್ನ್ ಜಿಕ್ಲ್ಯಾರಿ ಸಲ್ವಲ್ಯಾರಿ ಇನಾಮ್ ಆಮ್ಚ್ಯಾಚ್ ಫಿರ್ಗಜ್ಗಾರಾಂಕ್ ಫಾವೊ ಜತಾ ದೆಕುನ್ ಎಕ್ವಟಿತ್ ಸ್ಪಿರಿತಾನ್ ಖೆಳುಂಕ್ ಆಪೊವ್ಣೆಂ ದಿಲೆಂ.
ಖೆಳಾ ಮಧೆಂ ಸುಮಾರ್ ಏಕ್ ಘಂಟೊ ಭರ್ ಪಾವ್ಸಾನ್ ಖೆಳುಂಕ್ ಅಡ್ಕಳ್ ಹಾಡ್ಲ್ಯಾರಿ ಖೆಳ್ಗಡ್ಯಾಂಚಿಂ ಹುಮೆದ್ ನಿವುಂಕ್ ನಾ. ಪಾವ್ಸ್ ರಾವ್ಲ್ಯಾ ಉಪ್ರಾಂತ್ ಪತ್ರ್ಯಾನ್ ಆನಿಕ್ ಚಡಿತ್ ಉರ್ಭೆನ್ ಸರ್ವ್ ಖೇಳ್ಗಾಡಿ ಮೈದಾನಾಕ್ ದೆಂವ್ಲೆ. ಲ್ಹಾನಾ ಭುರ್ಗಿಂ ಆನಿ ಪ್ರಾಯ್ವಂತಾ ಸಯ್ತ್ ತಾಂಚ್ಯಾ ತಾಂಚ್ಯಾ ವಾಡ್ಯಾಚ್ಯಾಂಕ್ ಹುಮೆದಿನ್ ಭರ್ಚ್ಯಾಕ್ ಮೈದನಾರ್ ಆಸ್ಲ್ಲಿಂ. ಕಾರ್ಯಕ್ರಮಾಚೆಂ ವಿಶೇಷ್ ಆಕರ್ಷಣ್ ಜಾವ್ನ್ ಜಮ್ಲ್ಲ್ಯಾ ಸರ್ವಾಂಕ್ ಜಾಯ್ತಿತ್ಲೆಂ ಧಾದೊಶಿ ಮಾಪಾನ್ ಖಾಂವ್ಕ್ ಥಂಯ್ಸರ್ಚ್ ನಾರ್ಲೆಲ್ ತೆಲಾನ್ ಭಾಜುನ್ ತಾಯಾರ್ ಕೆಲ್ಲೆ ಗೋಳಿಬಜೆ ಆನಿ ಪೋಡಿ ತಶೆಂಚ್ ಮ್ಯಾಂಗೋ ಶೇಕ್ ಒಪೆನ್ ಕೌಂಟರ್ ಆಸಾ ಕೆಲ್ಲೆಂ. ಸಕ್ಡಾಂಕೀ ಹೆಂ ಖಾಣ್ ಮೆಚ್ವಾಲೆಂ ಆನಿ ಖುಶಾಲಿ ಆಸ್ಲ್ಲಿಂ.
ಖೆಳಾ ಪಂದ್ಯಾಟಾಚ್ಯಾ ಸಮಾರೋಪ್ ಕಾರ್ಯಾಕ್ ಮುಖೆಲ್ ಸಯ್ರೆ ಜಾವ್ನ್ ಉಡುಪಿ ವಾರಾಡ್ಯಾಚೆ ಯುವ ದಿರೆಕ್ತೊರ್ ತಶೆಂಚ್ ಕಟಪಾಡಿ ಫಿರ್ಗಜಿಚೆ ಫಿರ್ಗಜ್ ವಿಗಾರ್ ಮಾ.ಬಾ. ರೋನ್ಸನ್ ಡಿಸೋಜ ಹಾಜರ್ ಆಸ್ಲ್ಲೆ. ತಾಣಿಂ ಉಲವ್ನ್ ಸರ್ವ್ ಜಿಕ್ಲಲ್ಯಾ ತಶೆಂಚ್ ಭಾಗ್ ಘೆತ್ಲ್ಲ್ಯಾ ಖೆಳ್ಗಡ್ಯಾಂಕ್ ಅಭಿನಂದನ್ ಪಾಟಯ್ಲೆ ಆನಿ ಫಿರ್ಗಜಿಚ್ಯಾ ಎಕ್ವಟಾ ಥಂಯ್ ಅಸಲಿ ಕಾರ್ಯಿ ಪೂರಕ್ ಜಾತಾತ್ ಆನಿ ಸಕ್ಡಾಂನಿ ಸಾಂಗಾತಾ ಫಿರ್ಗಜ್ ಭಳಾಧಿಕ್ ಕರುಂಕ್ ಆಪೊವ್ಣೆ ದಿಲೆಂ. ಕಾರ್ಯಚ್ಯಾ ವೆದಿರ್ ಫಿರ್ಗಜ್ ವಿಗಾರ್ ಭೋ. ಮಾ. ಬಾ. ಸ್ಟ್ಯಾನಿ ಬಿ. ಲೋಬೊ, ಸಹಾಯಕ್ ಫಿರ್ಗಜ್ ಯಾಜಕ್ ಮಾ. ಬಾ. ರೋಲ್ವಿನ್ ಅರಾನ್ಹಾ, ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಶ್ರೀ ಮೆಲ್ವಿನ್ ನೊರೊನ್ಹಾ, 20 ಆಯೋಗಾಂಚೊ ಸಂಚಾಲಕ್ ಶ್ರೀ ಗೋಡ್ಫ್ರೀ ಡಿಸೋಜ, ಭಾಂಗರೋತ್ಸವ್ ಸಮಿತಿಚೊ ಅಧ್ಯಕ್ಷ್ ಶ್ರೀ ಮೈಕಲ್ ಡಿಸೊಜ, ಖೆಳಾ ಸಮಿತಿಚೊ ಸಂಚಾಲಕ್ ಶ್ರೀ ಜೋನ್ ಗೋಮ್ಸ್, ಐ.ಸಿ.ವೈ.ಎಮ್ ಸಚೇತಕ್ ಶ್ರೀ ರೋಯ್ಸ್ ಫೆರ್ನಾಂಡಿಸ್ ಆನಿ ಶ್ರೀಮತಿ ಜೂಲಿಯಾ ಡಿಸೋಜ, ಐ.ಸಿ.ವೈ.ಎಮ್ ಅಧ್ಯಕ್ಷ್ ರೋಯಲ್ ಕ್ಯಾಸ್ತೆಲಿನೊ ಆನಿ ಕಾರ್ಯದರ್ಶಿ ಜೇನ್ ಬೆಲಿಟಾ ಡಿಸೋಜ ಹಾಜರ್ ಆಸ್ಲ್ಲಿಂ. ಭಾಂಗರೋತ್ಸವ್ ಸಮಿತಿಚ್ಯಾ 50 ಕಾರ್ಯಕ್ರಮಾಂಚ್ಯಾ ಸಂಯೋಜಕ್ ಶ್ರೀ ಸ್ಟೀವನ್ ಕುಲಾಸೊನ್ ಇನಾಮಾಂಚೆಂ ಘೋಷಣ್ ಕೆಲೆಂ, ಜೇನ್ ಬೆಲಿಟಾನ್ ತಶೆಂಚ್ ಪ್ರತಿಕ್ಷಾ ಗೋಮ್ಸಾನ್ ಸುರ್ವೆಲೆಂ ಆನಿ ಅಕ್ರೆಚೆಂ ಕಾರ್ಯೆಂ ನಿರ್ವಹಣ್ ಕೆಲೆಂ ತಶೆಂಚ್ ಶ್ರೀ ಉರ್ಬನ್ ಫೆರ್ನಾಂಡಿಸ್, ಮೈಕಲ್ ಡಿಸೋಜ ಆನಿ ಸ್ಟೀವನ್ ಕುಲಾಸೊನ್ ಖೆಳಾ ಪಂಡ್ಯಾಟಾಂಚೆಂ ಮೇಲ್ವಿಚಾರಣ್ ಆನಿ ವೀಕ್ಷಕ್ ವಿವರಣ್ ದಿಲೆಂ.
ವಿವಿಧ್ ಪಂದ್ಯಾಟಾಂತ್ ಜಿಕ್ಲಲ್ಯಾ ವಾಡ್ಯಾಂಚಿ ನಾಂವಾಂ ಹೆ ಪರಿಂ ಆಸಾತ್:
ವಾಲಿಬಾಲ್
ಪಯ್ಲೆಂ : ಪಿಯಾದ್ ಸಿ
ದುಸ್ರೆಂ : ಕಾರ್ಮೆಲ್ ಎ
ತ್ರೋಬಾಲ್
ಪಯ್ಲೆಂ : ಸಾವುದ್ ಎ
ದುಸ್ರೆಂ : ರುಜಾರ್
ದೊರಿ ವೊಡ್ಚೆಂ ದಾದ್ಲ್ಯಾಂಕ್
ಪಯ್ಲೆಂ : ಸಾಂತ್ ಆಂತೊನ್ – ಸಾಂ ಜುಜೆ
ದುಸ್ರೆಂ : ಪಿಯಾದ್ ಬಿ
ದೊರಿ ವೊಡ್ಚೆಂ ಸ್ತ್ರೀಯಾಂಕ್
ಪಯ್ಲೆಂ : ಸಾವುದ್ ಬಿ- ವೆಲಂಕಣಿ
ದುಸ್ರೆಂ : ಪಿಯಾದ್ ಸಿ
ಫೋಟೊ: ಮಾಮ್ಮಿ ಡಿಜಿಟಲ್ ಸ್ಟುಡಿಯೊ, ಉದ್ಯಾವರ್
You may also like
![WhatsApp Image 2024-09-02 at 4.45.22 PM WhatsApp Image 2024-09-02 at 4.45.22 PM](https://sfxchurchudyavar.in/wp-content/uploads/2024/09/WhatsApp-Image-2024-09-02-at-4.45.22-PM-300x200.jpeg)
Catholic Sabha Udyavar organizes Intra-Parish Speech competition.
![WhatsApp Image 2024-09-02 at 2.24.14 PM (1) WhatsApp Image 2024-09-02 at 2.24.14 PM (1)](https://sfxchurchudyavar.in/wp-content/uploads/2024/09/WhatsApp-Image-2024-09-02-at-2.24.14-PM-1-300x200.jpeg)