ಆತ್ಮಿಕ್ ಸಂಗೀತ್ ಸಾಂಜ್ – ದೈವಿಕ್ ಅನ್ಭೋಗಾಕ್ ಸಾಕ್ಸ್ ಜಾಲಿ

ಉದ್ಯಾವರ್ ಐ.ಸಿ.ವೈ.ಎಮ್ ಸಂಚಲಾನಾಚ್ಯಾ ಭಾಂಗಾರೋತ್ಸವ್ ಕಾರ್ಯಕ್ರಮಾ ಬಾಬ್ತಿಂ ಆಸಾ ಕೆಲ್ಲ್ಯಾ 47ವೆಂ ಕಾರ್ಯಕ್ರಮ್ ಅತ್ಮಿಕ್ ಸಂಗೀತ್ ಸಾಂಜ್ ಜಮ್ಲಲ್ಯಾ ಸರ್ವ್ ಲೊಕಾಂಚಿಂ ಕಾಳ್ಜಾಂ ಮನಾಂ ದೆವಾಕ್ ಉಬಾರುಂಕ್ ಸಕ್ಲಿ. ಸುರ್ವೆರ್ ಆಸಾ ಕೆಲ್ಲ್ಯಾ ವೆದಿ ಕಾರ್ಯಕ್ರಮಾಂತ್ ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್‍ಲ್ಲ್ಯಾ ಶಿರ್ವ ವಾರಾಡ್ಯಾಚೆ ವಿಗಾರ್‍ವಾರ್ ಆನಿ ಶಿರ್ವ ಸಾವುದ್ ಮಾಯೆಚ್ಯಾ ಫಿರ್ಗಜಿಚೆ ವಿಗಾರ್ ಭೋ. ಮಾ. ಬಾ. ಡೆನಿಸ್ ಡೆಸಾ ಹಾಣಿಂ ಗಿಟಾರ್ ಖೆಳುನ್ ತಾಣಿಂಚ್ ರಚ್ಲಲೆಂ ‘ಹೊ ಸಂಸಾರ್ ತುಕಾ ಸಾಂಡಿತ್ ತರೀ ಹಾಂವ್ ಸಾಂಡ್ಚೊನಾಂ ತುಕಾ’ ಗೀತ್ ಗಾಂವ್ಚ್ಯಾ ಮುಕಾಂತ್ರ್ ವಿಶಿಷ್ಟ್ ರಿತಿನ್ ಹ್ಯಾ ಪ್ರಾಚಿತ್ ಕಾಳಾರ್ ಆಸಾ ಕೆಲ್ಲ್ಯಾ ಪ್ರಾಚಿತಾಚ್ಯಾ ಗಿತಾಂಚಿ ಸಂಗೀತ್ ಸಾಂಜ್ ಉಗ್ತಾವಣ್ ಕೆಲಿ. ತಾಣಿಂ ಆಪ್ಲ್ಯಾ ಉಲೊವ್ಪಾಂತ್ ವಿವಿಧ್ ಸಂಗೀತ್ ಕಲಾ, ವಾಜೊವ್ಪಿ ಆನಿ ಸಂಗೀತ್ ಮಾಧ್ಯಮಾಂಚೊ ಉಲ್ಲೇಕ್ ಕರ್ನ್, ಅಸಲಿ ಆತ್ಮೀಕ್ ಸಂಗೀತ್ ಸಾಂಜ್ ಆಸಾ ಕರುಂಕ್ ಧೈರ್ ಗರ್ಜ್ ಆಸಾ ಆನಿ ಸರ್ವಾಂಕ್ ಬರಿ ಆತ್ಮೀಕ್ ಅನ್ಭೋಗಾಚಿ ಸಾಂಜ್ ಮಾಗ್ಲಿ.

ವೆದಿರ್ ಅಧ್ಯಕ್ಷ್ ಸ್ಥಾನಾರ್ ಹಾಜರ್ ಆಸ್‍ಲ್ಲ್ಯಾ ಫಿರ್ಗಜ್ ವಿಗಾರ್ ಭೋ. ಮಾ. ಬಾ. ಸ್ಟ್ಯಾನಿ ಬಿ. ಲೋಬೊ, ಉಲೊವ್ನ್ ಹಿ ಏಕ್ ವಿಶಿಷ್ಟ್ ಸಾಂಜ್ ಆನಿ ಪ್ರಾಚಿತ್ ಕಾಳಾರ್ ಆಮ್ಕಾಂ ಸರ್ವಾಂಕ್ ಭೊವ್‍ಚ್ ಉಪ್ಕಾರ್ತಲಿ. ಸಂಸಾರಾಚ್ಯಾ ವಿವಿಧ್ ಸಂಗ್ತಿಂ ಮಧೆಂ ಬುಡ್ಲಲ್ಯಾ ಆಮ್ಚಿಂ ಕಾಳ್ಜಾಂ ಮನಾಂ ದೆವಾ ಥಂಯ್ ಉಬಾರುಂಕ್ ಹಿ ಕುಮಕ್ ಕರ್ತಲಿ ಮ್ಹಣಾಲೊ. ಆಜ್ ವಿಂಡ್ ಇನಸ್ಟ್ರುಮೆಂಟ್ ಖೆಳುನ್ ಹಿ ಸಂಗೀತ್ ಸಾಂಜ್ ಚಲೊಂವ್ಕ್ ಆಯಿಲ್ಲ್ಯಾ ಶ್ರೀ ರುಬೆನ್ ಮಚಾದೊಕ್ ಸನ್ಮಾನ್ ಕೆಲೊ. ತಶೆಂಚ್ ಸಯ್ರೆ ಕಲಾಕರ್ ಜಾವ್ನ್ ಆಜ್ ಸಂಗೀತಾಂತ್ ಸಾಂಗಾತ್ ದಿಂವ್ಚ್ಯಾ ಫಿರ್ಗಜಿಚಿಂ ಉದೆವ್ನ್ ಯೆಂವ್ಚಿಂ ತಾಲೆಂತಾ ವೆನಿಸ್ಸಾ ತಾವ್ರೊ, ಸಂದೀಪ್ ರೊಡ್ರಿಗಸ್ ಆನಿ ಟ್ರೆವನ್ ಪಿರೆರಾಕ್ ತಶೆಂಚ್ ಕಾರ್ಯಕ್ರಮಾಚಿ ನಿರೂಪಕಿ ಶ್ರೀಮತಿ ಮರಿಯ ಪಿರೆರಾಕ್ ಮಾನ್ ಕೆಲೊ ಆನಿ ಆಯ್ಚ್ಯಾ ಕಾರ್ಯಕ್ರಮಾಕ್ ಪ್ರಾಯೋಜಕತ್ವ್ ಆಪ್ಣಾಯ್ಲ್ಯಾ (ಭುಗ್ರ್ಯಾಂ ತರ್ಫೆನ್) ಶ್ರೀಮತಿ ಲಿಲ್ಲಿ ಡಿ’ಅಲ್ಮೆಡಾಚೊ ಉಪ್ಕಾರ್ ಭಾವುಡ್ಲೊ. ಶ್ರೀ ಮೈಕಲ್ ಡಿಸೋಜನ್ ಜಮ್ಲಲ್ಯಾ ಸಮೆಸ್ತಾಂಕ್ ಸ್ವಾಗತ್ ಕೆಲೊ, ಶ್ರೀಮತಿ ರೋಶಿನಿ ಕುಲಾಸೊನ್ ಶ್ರೀ ರುಬೆನ್ ಮಚಾದೊಚಿ ವೆಕ್ತಿ ಪರಿಚಯ್ ಕರ್ನ್ ದಿಲಿ, ಪ್ರಿತೀಶ್ ಪಿಂಟೊನ್ ಧನ್ಯವಾದ್ ದಿಲೊ ಆನಿ ಮೆಲಿಸ್ಸಾ ದಾಂತಿನ್ ಕಾರ್ಯೆ ಚಲೊವ್ನ್ ವೆಲೆಂ.

ಕಾರ್ಯಕ್ರಮಾಚ್ಯಾ ವೆದಿರ್ ಕಲ್ಯಾಣ್ಪುರ್ ಕಾಥೆದ್ರಾಲಾಚೆ ರೆಕ್ಟರ್ ಭೋ. ಮಾ. ಬಾ. ವಲೇರಿಯನ್ ಮೆಂಡೊನ್ಸಾ, ಉದ್ಯಾವರ್ಚೆ ಸಹಾಯಕ್ ವಿಗಾರ್ ಮಾ. ಬಾ. ರೋಲ್ವಿನ್ ಅರಾನ್ಹಾ, ಬ್ಯಾಂಡ್ ಅಗಾಪೆ ಪಂಗ್ಡಾಚೆ ಶ್ರೀ ರಿಚರ್ಡ್ ಮಚಾದೊ, ಉಪಾಧ್ಯಕ್ಷ್ ಶ್ರೀ ಮೆಲ್ವಿನ್ ನೊರೊನ್ಹಾ, ಭಾಂಗಾರೋತ್ಸವ್ ಸಮಿತಿಚೆ ಅಧ್ಯಕ್ಷ್ ಆನಿ ಫಿರ್ಗಜಿಚೆ ಕಾರ್ಯದರ್ಶಿ ಶ್ರೀ ಮೈಕಲ್ ಡಿಸೋಜ್, 50 ಕಾರ್ಯಕ್ರಮಾಂಚೆ ಸಂಚಾಲಕ್ ಶ್ರೀ ಸ್ಟೀವನ್ ಕುಲಾಸೊ, ಭಾಂಗಾರೋತ್ಸವ್ ಸಮಿತಿ ಪ್ರಧಾನ್ ಕಾರ್ಯದರ್ಶಿ ಶ್ರೀಮತಿ ಡೊರಾ ರೋಜ, ಐ.ಸಿ.ವೈ.ಎಮ್ ಅಧ್ಯಕ್ಷ್ ರೋಯಲ್ ಕ್ಯಾಸ್ತೆಲಿನೊ, ಕಾರ್ಯದರ್ಶಿ ಜೇನ್ ಡಿಸೊಜ ಆನಿ ಕಾರ್ಯಕ್ರಮಾಚಿ ಪ್ರಾಯೋಜಕಿ ಶ್ರೀಮತಿ ಲಿಲ್ಲಿ ಡಿ’ಅಲ್ಮೇಡಾ (ಭುಗ್ರ್ಯಾಂ ತರ್ಫೆನ್) ಹಾಜರ್ ಆಸ್‍ಲ್ಲಿಂ.

ಸಬಾರ್ ಯಾಜಕ್ ಭಾವ್, ಧಾರ್ಮಿಕ್ ಭಯ್ಣಿಂ ಆನಿ ವಿವಿಧ್ ಫಿರ್ಗಜಿ ಥಾವ್ನ್ ಭಕ್ತಿಕ್ ಹಾಜರ್ ಆಸ್‍ಲ್ಲೆ. ರುಬೆನಾಚ್ಯಾ ಮಾಂತ್ರಿಕ್ ಫ್ಲೂಟ್ ಆನಿ ಸ್ಯಾಕ್ಸೊಫೋನ್ ವಾಜವ್ಪಾ ಸವೆಂ ರಿಚರ್ಡ್ ಮಚಾದೊನ್ ಕೀಬೋರ್ಡಾರ್ ಸಾಂಗಾತ್ ದೀವ್ನ್, ಶ್ರೀಮತಿ ಮರಿಯ ಪಿರೆರಾಚ್ಯಾ ಆದ್ಯಾತ್ಮಿಕ್ ನಿರೂಪಣಾಂ ಮುಕಾಂತ್ರ್ ಹಿ ಆತ್ಮೀಕ್ ಸಂಗೀತ್ ಸಾಂಜ್ ಜಮ್ಲಲ್ಯಾ ಸಕ್ಕಡ್ ಭಕ್ತಿಕಾಂಚಿ ಕಾಳ್ಜಾಂ ಮನಾಂ ದೆವಾಕ್ ಉಬಾರುಂಕ್ ಸಕ್ಲಿ ತಶೆಂಚ್ ಹ್ಯಾ ಪ್ರಾಚಿತಾಚ್ಯಾ ಕಾಳಾರ್ ಆತ್ಮಿಕ್ ಜಿವಿತಾಂತ್ ಅನಿಕಿ ಗೂಂಡ್ ರಿಗುಂಕ್ ಆಧಾರ್ ಜಾಲಿ.